Të paktën tetë ushtarë janë vrarë dhe disa të tjerë janë plagosur ose zhdukur pas një sulmi nga Shteti Islamik në Afrikën Perëndimore (IKDA) në verilindje të Nigerisë, thanë të premten (24 shtator) dy burime pranë ushtrisë franceze.

Sipas burimeve, xhihadistët sulmuan me raketa një bazë ushtarake që lëvizte midis qyteteve Dikua dhe Marte në shtetin Borno.

“Terroristët sulmuan (bazën) me disa raketa, duke vrarë tetë ushtarë. Disa të tjerë mungojnë”, tha një zyrtar.

Tetë ushtarë të tjerë dhe një anëtar i një grupi paramilitar të përfshirë në operacionet anti-xhihadiste u plagosën, sipas të njëjtit burim.

Një burim i dytë ushtarak e konfirmoi raportin për AFP.

Xhihadistët rrëmbyen dy automjete ushtarake dhe i vunë zjarrin tre të tjera.

Ishte sulmi i dytë në më pak se dy javë nga IKDA kundër Forcave të Armatosura Nigeriane, e cila po përpiqet t’i japë fund kryengritjes xhihadiste që ka marrë jetën e më shumë se 40,000 njerëzve në 12 vjet.

Dhjetë ditë më parë, të paktën 16 ushtarë dhe dy paramilitarë u vranë në një pritë; ishte operacioni më vdekjeprurës që nga fillimi i vitit. IKDA, e cila mori përgjegjësinë për të, pretendoi se 25 ushtarë humbën jetën.

Xhihadistët shpërthyen bomba në anë të rrugës para se të qëllonin me raketa në një makinë që udhëtonte nga Maiduguri, kryeqyteti i shtetit Borno, në qytetin e fortifikuar të Monguno.

Kohët e fundit grupi ekstremist ka shtuar sulmet ndaj civilëve në aksin Maiduguri-Monguno, i cili shtrihet për rreth 135 kilometra.

Ata kanë ngritur pika kontrolli,duke zhvatur para dhe sende të tjera nga shoferët dhe më pas i kanë vrarë ata, sipas dëshmive të banorëve.

Sulmet pothuajse të përditshme e detyruan ushtrinë të patrullojë përgjatë rrugës, sipas burimeve pranë forcave të armatosura.